मुंबई-पुण्याच्या धर्तीवर पिंपळवंडीत अत्याधुनिक अभ्यासिका

मुंबई-पुण्याच्या धर्तीवर पिंपळवंडीत अत्याधुनिक अभ्यासिका

 आमदार सुरेश धस यांच्या मार्गदर्शनाखाली सरपंच निलेश मोरे यांचा पुढाकार; ग्रामीण विद्यार्थ्यांना गावातच मिळणार दर्जेदार सुविधा

पाटोदा (प्रतिनिधी) ग्रामीण भागातील विद्यार्थ्यांना स्पर्धा परीक्षांच्या तयारीसाठी मुंबई, पुणे यांसारख्या शहरांकडे धाव घ्यावी लागू नये, आपल्या गावातच शांत, शिस्तबद्ध आणि आधुनिक अभ्यासाचे वातावरण उपलब्ध व्हावे, या उद्देशाने ग्रामपंचायत पिंपळवंडीच्या वतीने सुसज्ज व अत्याधुनिक अभ्यासिका उभारण्याचा अभिनव उपक्रम हाती घेण्यात आला आहे.

आमदार सुरेश आण्णा धस यांच्या मार्गदर्शनाखाली सरपंच निलेश मोरे यांनी या उपक्रमासाठी पुढाकार घेतला असून, उपसरपंच व ग्रामपंचायत सदस्यांचेही सहकार्य लाभत आहे.

शहराच्या धर्तीवर आधुनिक सुविधा

मुंबई आणि पुणे यांसारख्या शहरांमध्ये स्पर्धा परीक्षांच्या विद्यार्थ्यांसाठी उपलब्ध असलेल्या अभ्यासिकांच्या धर्तीवर पिंपळवंडी येथे आधुनिक पद्धतीची अभ्यासिका उपलब्ध करून देण्याचा प्रयत्न करण्यात येत आहे. त्यामुळे पिंपळवंडी तसेच परिसरातील विद्यार्थ्यांना अभ्यासासाठी योग्य वातावरण मिळणार असून, विविध स्पर्धा परीक्षांची तयारी करणाऱ्या युवक-युवतींना याचा लाभ घेता येणार आहे.ग्रामीण भागातील अनेक विद्यार्थी आर्थिक परिस्थितीमुळे मोठ्या शहरांमध्ये जाऊन महागड्या अभ्यासिका किंवा वाचनालयांचा खर्च करू शकत नाहीत. ही बाब लक्षात घेऊन ग्रामपंचायतीने विद्यार्थ्यांना गावातच दर्जेदार अभ्यासाची सुविधा उपलब्ध करून देण्याचा निर्णय घेतला आहे. गावातील विद्यार्थ्यांच्या शैक्षणिक प्रगतीला चालना देण्यासाठी ग्रामपंचायतीच्या माध्यमातून हा उपक्रम राबविण्यात येत आहे. विद्यार्थ्यांना योग्य वातावरण आणि सुविधा उपलब्ध करून देण्यासाठी सरपंच निलेश मोरे यांनी पुढाकार घेतला असून, ग्रामपंचायत पदाधिकारी व सदस्यांचे सहकार्य लाभत आहे.

“विद्यार्थ्यांच्या स्वप्नांना बळ देणे हा मुख्य उद्देश” — सरपंच निलेश मोरे

सरपंच निलेश मोरे म्हणाले, “पिंपळवंडी आणि परिसरातील विद्यार्थ्यांना स्पर्धा परीक्षेच्या तयारीसाठी शहराकडे जावे लागू नये, हा आमचा मुख्य उद्देश आहे. ग्रामीण भागातील विद्यार्थ्यांमध्ये गुणवत्ता, जिद्द आणि मेहनत मोठ्या प्रमाणात आहे. त्यांना केवळ योग्य वातावरण आणि आवश्यक सुविधा मिळण्याची गरज आहे. मुंबई-पुण्याच्या धर्तीवर गावातच अत्याधुनिक अभ्यासिका उपलब्ध करून देऊन विद्यार्थ्यांच्या स्वप्नांना बळ देण्याचा आमचा प्रयत्न आहे. विद्यार्थ्यांनी या सुविधेचा जास्तीत जास्त उपयोग करून आपल्या गावाचे आणि कुटुंबाचे नाव उज्ज्वल करावे.” ग्रामीण विद्यार्थ्यांच्या स्वप्नांना मिळणार बळ

ग्रामीण भागातील विद्यार्थ्यांमध्ये गुणवत्ता, जिद्द आणि मेहनतीची कमतरता नाही. मात्र अनेकदा योग्य अभ्यासाचे वातावरण, सुविधा आणि मार्गदर्शनाचा अभाव जाणवतो. अशा परिस्थितीत गावातच सुसज्ज अभ्यासिका उपलब्ध झाल्यास विद्यार्थ्यांना स्पर्धा परीक्षांच्या तयारीसाठी मोठी मदत होऊ शकते.

पिंपळवंडी ग्रामपंचायतीच्या या उपक्रमामुळे ग्रामीण भागातील विद्यार्थ्यांना स्पर्धा परीक्षेच्या तयारीसाठी एक नवे व्यासपीठ मिळणार असून, “गावातील विद्यार्थीही अधिकारी होऊ शकतात” हा आत्मविश्वास निर्माण करण्याच्या दृष्टीने हा उपक्रम महत्त्वाचा ठरणार आहे.