जागतिक कामगार दिनानिमित्त मादळमोही येथे महिला कामगार मेळाव्याचे आयोजन-शाहीन पठाण

           गेवराई, दि. २८ ( प्रतिनिधी ) : जागतिक कामगार दिनानिमित्त  क्रांती महिला असंघटित कामगार युनियनच्या वतीने संघटनेच्या प्रमुख पदाधिकारी आणि कार्यकर्त्यांचा मेळावा मादळमोही येथे १ मे २०२४ रोजी सकाळी ११ वाजता घेण्यात येणार आहे अशी माहिती क्रांती महिला असंघटित कामगार युनियन संघटनेच्या अध्यक्ष शाहीन पठाण यांनी प्रमुख कार्यकर्त्यांच्या जातेगांव येथील बैठकीत दिली आहे.

        १ मे २०२४ रोजी जागतिक कामगार दिनानिमित्त होणारी बैठक क्रांती महिला असंघटित कामगार युनियनची महत्त्वाची बैठक असून या बैठकीमध्ये संघटनेच्या वाढीसाठी नवीन पदाधिकाऱ्यांच्या निवडी करून त्यांना नियुक्तीपत्र देणे, सभासद नोंदणीचा आढावा घेणे, संघटनेच्या प्रमुख पदाधिकाऱ्यांचे प्रश्न आणि अडीअडचणी समजून घेणे याचाही यावेळी विचार करण्यात येणार आहे.

           बीड जिल्हा हा ऊसतोड कामगारांचा जिल्हा आहे. गाव पातळीवरील मजुरांच्या हाताला काम नसल्यामुळे नाईलाजाने त्यांना बाहेरगावी कामाला जावे लागते. बाहेरगावी मजुरांना कामाला जावे लागल्याने बालविवाह, महिलांच्या गर्भाच्या पिशव्या काढणे , स्थलांतरामुळे मुलांचे शिक्षण थांबणे असे अनेक प्रश्न उद्भवले जात आहेत. त्यामुळे मजुरांना गावातच काम उपलब्ध करून देण्यासाठी आपल्याला भविष्यात काम करावे लागेल, असे आवाहन कडुदास कांबळे यांनी कार्यकर्त्यांच्या बैठकीमध्ये केले. या संदर्भाने १ मे २०२४ रोजी आपण ठोस कृती कार्यक्रम घेऊन पुढे गेल पाहिजे त्यासाठी आपण सर्वांनी योग्य त्या सूचना कराव्यात असेही यावेळी सांगण्यात आले.

         या कार्यकर्त्यांच्या बैठकीमध्ये क्रांती महिला युनियन संघटनेच्या प्रदेश संघटक शकुंतला घुंगासे, मराठवाडा अध्यक्ष मंगल राठोड, जिल्हा अध्यक्ष कविताताई डोंगरे, गेवराई तालुका अध्यक्ष मनीषा शरणांगत, आकांक्षा घाटूळ, रोहिणी राऊत, मंदाताई चौधरी यांच्यासह बहुसंख्य कार्यकर्त्या उपस्थित होत्या.