आचारसंहितेत ही मशाल सताड उघडी; तिला झाका - एस.एम.युसूफ़

बीड (प्रतिनिधी) - सध्या लोकसभा निवडणुकीच्या अनुषंगाने आदर्श आचारसंहिता लागू आहे. याचे पालन करताना काही बाबी मात्र प्रशासनाकडून सुटत आहेत. अशाचप्रकारे बीड शहरातील तुळजाई चौकात नगर परिषदेने लावलेली ही मशाल सुद्धा सुटली आहे. तिच्यावर काहीतरी टाकून झाकणे आवश्यक आहे. या उघड्या मशालीमुळे निवडणुकीत उतरणाऱ्या एका राजकीय पक्षाचा प्रचार व प्रसार होत आहे. जे आदर्श आचारसंहितेला मारक असून आचारसंहितेचे उल्लंघन करणारे आहे. असे मत मुक्तपत्रकार एस.एम.युसूफ़ यांनी दिलेल्या प्रसिद्धी पत्रकातून व्यक्त केले आहे.

काही दिवसांपूर्वी आदर्श आचारसंहितेचे पालन करताना शहरातील छत्रपती शिवाजी महाराज चौकालगत असलेल्या मल्टीपर्पज मैदानाच्या कमानीवरून माजी नगराध्यक्ष डॉ. भारतभूषण क्षीरसागर यांच्या कोरलेल्या नावाकडे प्रसिद्धी माध्यमातून प्रशासनाचे लक्ष वेधले होते. याची प्रशासनाने तत्परतेने दखल घेऊन ते नाव झाकले. असे असताना बीड शहरातील मोठ्या चौकांपैकी एक चौक असलेल्या तुळजाई चौकातील ही एवढी मोठी मशाल मात्र आचारसंहितेच्या अंमलबजावणीतून अद्यापपर्यंत सुटलेली आहे. मशाल हे निवडणुकीत उतरणाऱ्या एका राजकीय पक्षाचे निवडणूक चिन्ह आहे. याकडे बहुतेक प्रशासनाचे अजूनही लक्ष गेले नाही म्हणून पुन्हा एकदा आचारसंहितेच्या अंमलबजावणी करिता प्रशासनाने याकडे लक्ष द्यावे व प्रशासनाकडून सदरील मशाल झाकण्यात यावी जेणेकरून आचारसंहितेचे पालनही होईल व निवडणूक लढविणाऱ्या एका पक्षाचा प्रचार व प्रसार होणार नाही. तेव्हा या मशाललाही लोकसभा निवडणुकीचा निकाल येईपर्यंत तरी चांगले झाकून ठेवावे असे मुक्तपत्रकार एस.एम.युसूफ़ यांनी दिलेल्या प्रसिद्धी पत्रकातून म्हटले आहे.