विकसित भारत यंग लीडर्स डायलॉग २०२७ : विकसित भारत क्विझमध्ये बीडच्या युवक-युवतींनी मोठ्या संख्येने सहभागी व्हावे

विकसित भारत यंग लीडर्स डायलॉग २०२७ : विकसित भारत क्विझमध्ये बीडच्या युवक-युवतींनी मोठ्या संख्येने सहभागी व्हावे

सामाजिक कार्यकर्ते तथा लेक लाडकी अभियानाचे बीड जिल्हा समन्वयक बाजीराव ढाकणे यांचे आवाहन

बीड प्रतिनिधी : - देशाच्या विकासप्रक्रियेत युवकांचा सक्रिय सहभाग वाढविणे आणि नव्या भारताच्या उभारणीसाठी तरुणांच्या कल्पना, नेतृत्वगुण व नवोन्मेषाला राष्ट्रीय व्यासपीठ उपलब्ध करून देण्याच्या उद्देशाने केंद्र सरकारच्या युवा कार्यक्रम व क्रीडा मंत्रालयाच्या वतीने ‘विकसित भारत यंग लीडर्स डायलॉग (VBYLD) २०२७’ या उपक्रमाचे आयोजन करण्यात आले आहे. या उपक्रमाचा पहिला टप्पा असलेल्या ‘विकसित भारत क्विझ २०२७’मध्ये बीड जिल्ह्यातील युवक-युवतींनी मोठ्या संख्येने सहभागी व्हावे, असे आवाहन सामाजिक कार्यकर्ते तथा लेक लाडकी अभियानाचे बीड जिल्हा समन्वयक बाजीराव ढाकणे यांनी केले आहे.

१७ ऑगस्ट ते ३० सप्टेंबर २०२६ या कालावधीत विकसित भारत क्विझचे आयोजन करण्यात आले असून, १५ ते २९ वर्षे वयोगटातील युवक-युवती या उपक्रमात सहभागी होऊ शकतात. ही क्विझ MY Bharat आणि MyGov या डिजिटल व्यासपीठांवर आयोजित करण्यात आली आहे. क्विझमध्ये भारताचा इतिहास, वारसा, विकासाचा प्रवास, देशाची उपलब्धी तसेच ‘विकसित भारत @२०४७’ या संकल्पनेशी संबंधित विविध विषयांवर युवकांच्या ज्ञानाची चाचणी घेतली जाणार आहे. 

क्विझपासून राष्ट्रीय व्यासपीठापर्यंत संधी

VBYLD २०२७ हा केवळ प्रश्नमंजुषेचा उपक्रम नसून युवकांना नेतृत्व, नवकल्पना आणि राष्ट्रनिर्मितीच्या प्रक्रियेत सहभागी करून घेणारी टप्प्याटप्प्याने पुढे जाणारी संधी आहे. क्विझनंतर निबंध स्पर्धा, जिल्हास्तरीय चॅम्पियनशिप, राज्य/केंद्रशासित प्रदेश स्तरावरील VBYLD आणि त्यानंतर राष्ट्रीय स्तरावरील कार्यक्रम, असा या उपक्रमाचा प्रवास आहे. राष्ट्रीय स्तरावरील VBYLD १० ते १२ जानेवारी २०२७ रोजी नवी दिल्ली येथे होणार आहे. निवडक युवकांना आपल्या कल्पना आणि विकासविषयक विचार राष्ट्रीय स्तरावर मांडण्याची संधी मिळणार आहे. 

बीडच्या युवकांनी संधीचे सोने करावे – बाजीराव ढाकणे

याबाबत बोलताना बाजीराव ढाकणे म्हणाले की, “बीड जिल्ह्यातील युवकांमध्ये प्रचंड क्षमता, बुद्धिमत्ता आणि नेतृत्वगुण आहेत. ग्रामीण व शहरी भागातील युवकांनी कोणताही न्यूनगंड न बाळगता अशा राष्ट्रीय उपक्रमांमध्ये सक्रिय सहभाग घेतला पाहिजे. विकसित भारताचे स्वप्न साकार करण्यासाठी युवकांची भूमिका अत्यंत महत्त्वाची आहे. त्यामुळे बीड जिल्ह्यातील प्रत्येक पात्र युवक-युवतीने विकसित भारत क्विझमध्ये सहभागी होऊन आपल्या ज्ञानाची आणि क्षमतेची ओळख निर्माण करावी.”

आजच्या डिजिटल युगात युवकांना केवळ रोजगाराच्या संधींचीच नव्हे, तर नेतृत्व, धोरणनिर्मिती, नवकल्पना आणि सामाजिक परिवर्तनामध्ये सहभागी होण्याच्या संधींचीही गरज आहे. VBYLD २०२७ या दृष्टीने महत्त्वपूर्ण व्यासपीठ ठरू शकते, असेही बाजीराव ढाकणे यांनी नमूद केले.

शैक्षणिक संस्था व युवक संघटनांनी पुढाकार घ्यावा

बीड जिल्ह्यातील महाविद्यालये, शैक्षणिक संस्था, युवक मंडळे, स्वयंसेवी संस्था आणि युवक संघटनांनी या उपक्रमाची व्यापक जनजागृती करावी. पात्र युवक-युवतींना क्विझमध्ये सहभागी होण्यासाठी प्रोत्साहित करून जिल्ह्यातून मोठ्या प्रमाणात सहभाग नोंदविण्यासाठी प्रयत्न करावेत, असे आवाहनही ढाकणे यांनी केले.

“बीडचा युवक केवळ स्पर्धेत सहभागी होणारा नसून विकसित भारताच्या निर्मितीत योगदान देणारा युवा नेतृत्वकर्ता झाला पाहिजे,” असा विश्वास व्यक्त करत बाजीराव ढाकणे यांनी जिल्ह्यातील युवक-युवतींना या राष्ट्रीय संधीचा लाभ घेण्याचे आवाहन केले.

अधिकृत सहभाग

कुठे सहभागी व्हावे : MY Bharat पोर्टल - http://mybharat.gov.in वर ऑनलाईन. 22 भारतीय भाषांमध्ये ही क्विझ उपलब्ध आहे.

विकसित भारत क्विझमध्ये सहभागी होण्यासाठी MY Bharat पोर्टल किंवा MyGov क्विझ प्लॅटफॉर्मवर नोंदणी करून क्विझ देता येते. MyGov वरील क्विझमध्ये २० प्रश्नांसाठी ६०० सेकंदांचा कालावधी असून सहभागानंतर ई-प्रमाणपत्राची सुविधाही उपलब्ध आहे. 

“तुमचे ज्ञान, तुमचा आवाज आणि विकसित भारताच्या निर्मितीकडे तुमचे पहिले पाऊल!” या भावनेने बीड जिल्ह्यातील युवक-युवतींनी मोठ्या संख्येने सहभागी व्हावे, असे आवाहन श्री. बाजीराव नवनाथ ढाकणे, बीड जिल्हा समन्वयक, लेक लाडकी अभियान, महाराष्ट्र राज्य यांनी केले आहे. 

अधिक माहितीसाठी संपर्क साधण्यासाठी श्री सागर उज्जैनकर ,

जिल्हा युवा अधिकारी,भारत सरकार, माय भारत कार्यालय, हिरो शोरुम जवळ , नगर रोड,बीड