बीड जिल्हा रुग्णालयाने माणसं मारण्याची सुपारी घेतली काय? ऑक्सिजन ह्युमिडिफायरमधील गढूळ पाण्याचा प्रकार
बीड जिल्हा रुग्णालयाने माणसं मारण्याची सुपारी घेतली काय? ऑक्सिजन ह्युमिडिफायरमधील गढूळ पाण्याचा प्रकार
रुग्णाला ऑक्सिजन देताना ह्युमिडिफायरमधील पाणी गढूळ आढळले; पालकमंत्री सुनेत्रा पवार, आरोग्यमंत्री प्रकाश आबिटकर यांना तक्रार : डॉ. गणेश ढवळे
बीड : (दि. २५) बीड जिल्हा रुग्णालयातील अनागोंदी कारभार संपण्याचे नाव घेत नसून, रुग्णांच्या उपचारातील हलगर्जीपणाच्या तक्रारींमुळे रुग्णांच्या सुरक्षिततेचा प्रश्न पुन्हा ऐरणीवर आला आहे. काही दिवसांपूर्वी वडवणी येथील संध्या सूरज पवार प्रसूतीसाठी बीड जिल्हा रुग्णालयात दाखल झाल्यानंतर सिझेरियन शस्त्रक्रियेदरम्यान वैद्यकीय साहित्य शरीरात राहिल्याचा आरोप करण्यात आला होता. त्यानंतर संसर्ग झाल्याने आतडे तसेच गर्भाशय काढण्याची शस्त्रक्रिया करावी लागल्याचा आरोप असून, या प्रकरणामुळे जिल्ह्यात संतापाचे वातावरण आहे.
दरम्यान, बीड जिल्हा रुग्णालयातील सेमी आयसीयू कक्षात उपचार घेत असलेल्या एका रुग्णाला सोनोग्राफीसाठी खाली आणण्यात येत असताना श्वास घेण्यास त्रास होऊ लागला. त्यामुळे रुग्णाला ऑक्सिजन मास्क लावून नेण्यात आले. मात्र, रुग्णाला ऑक्सिजन पुरवठा करणाऱ्या ह्युमिडिफायरमधील पाणी अत्यंत गढूळ असल्याचे निदर्शनास आले असा आरोप करण्यात आला आहे.
संबंधित कर्मचाऱ्यांच्या निदर्शनास ही बाब आणून दिल्यानंतर ह्युमिडिफायरमधील पाणी काढून टाकण्यात आले आणि रुग्णाला नवीन ह्युमिडिफायर लावून ऑक्सिजन पुरवठा सुरू करण्यात आला, अशी माहिती आहे.
ह्युमिडिफायरमध्ये पाणी का वापरले जाते?
ऑक्सिजन पुरवठा करताना काही परिस्थितींमध्ये ह्युमिडिफायरचा वापर ऑक्सिजनला आर्द्रता देण्यासाठी केला जातो. त्यामुळे नाक, घसा आणि श्वसनमार्गातील कोरडेपणा व जळजळ कमी करण्यास मदत होऊ शकते. ह्युमिडिफायरमध्ये वापरले जाणारे पाणी उपकरणाच्या उत्पादकाच्या सूचनांनुसार आणि रुग्णालयाच्या संसर्ग-नियंत्रण प्रोटोकॉलनुसार योग्य दर्जाचे व आवश्यकतेनुसार निर्जंतुक असणे महत्त्वाचे आहे.
गढूळ पाण्यामुळे काय धोका?
ह्युमिडिफायरमधील पाणी गढूळ, रंग बदललेले, दुर्गंधीयुक्त किंवा गाळयुक्त आढळल्यास ते दूषित असण्याची शक्यता तपासणे आवश्यक आहे. अशा पाण्यात सूक्ष्मजीवांची वाढ झालेली असल्यास ह्युमिडिफायरच्या माध्यमातून निर्माण होणाऱ्या सूक्ष्म थेंबांमुळे श्वसनमार्गाच्या संसर्गाचा धोका निर्माण होऊ शकतो. विशेषतः आयसीयू, गंभीर आजारी किंवा प्रतिकारशक्ती कमी असलेल्या रुग्णांमध्ये संसर्गाचा धोका अधिक गंभीर ठरू शकतो.
ह्युमिडिफायरची बाटली किंवा त्यातील पाणी योग्य पद्धतीने बदलले अथवा स्वच्छ केले नाही तर त्यामध्ये जैविक थर (बायोफिल्म) तयार होऊन सूक्ष्मजीवांची वाढ होण्याची शक्यता असते. त्यामुळे अशा प्रकारची घटना घडल्यास रुग्णालयाच्या संसर्ग नियंत्रण समितीने (Infection Control Committee) तातडीने पाहणी करणे आवश्यक आहे.
पाण्याची प्रयोगशाळा तपासणी करण्याची मागणी
ह्युमिडिफायरमधील गढूळ पाण्याचा नमुना उपलब्ध असल्यास त्याची अधिकृत प्रयोगशाळेत सूक्ष्मजीवशास्त्रीय तपासणी करण्यात यावी. तसेच ह्युमिडिफायरची बाटली, ऑक्सिजन ट्यूबिंग, पाणी बदलण्याची प्रक्रिया, स्वच्छता व निर्जंतुकीकरणाची नोंद यांचीही तपासणी करण्यात यावी. रुग्णालयात अशा उपकरणांची नियमित तपासणी व संसर्ग नियंत्रणाची प्रक्रिया काटेकोरपणे राबवली जाते का, याची चौकशी करण्याची मागणी करण्यात आली आहे.
“रुग्णांच्या जीवाशी खेळ सुरू आहे काय?”
बीड जिल्हा रुग्णालयातील वारंवार समोर येणाऱ्या तक्रारी आणि रुग्णांच्या उपचारातील कथित हलगर्जीपणाबाबत “बीड जिल्हा रुग्णालयाने माणसं मारण्याची सुपारी घेतली आहे काय?” असा संतप्त सवाल सामाजिक कार्यकर्ते तथा मुख्य प्रचार प्रमुख, बीड जिल्हा माहिती अधिकार कार्यकर्ता महासंघ महाराष्ट्र राज्य, डॉ. गणेश ढवळे लिंबागणेशकर यांनी केला आहे.
या प्रकरणाची तातडीने चौकशी करून रुग्णालयातील ऑक्सिजन पुरवठा यंत्रणा, ह्युमिडिफायरमधील पाण्याची गुणवत्ता, स्वच्छता व निर्जंतुकीकरणाची प्रक्रिया तपासावी. दोष आढळल्यास संबंधित अधिकारी व कर्मचाऱ्यांवर नियमानुसार कठोर कारवाई करावी, अशी मागणी डॉ. ढवळे यांनी केली आहे.
याबाबत पालकमंत्री सुनेत्रा पवार आणि आरोग्यमंत्री प्रकाश आबिटकर यांच्याकडे लेखी तक्रार करण्यात आली असून, रुग्णांच्या जीविताशी संबंधित बाब असल्याने तातडीने चौकशी करण्याची मागणी करण्यात आली आहे.
Comments
Post a Comment