पाटोद्यात बसथांब्यावर निवाराशेडचा अभाव; शाळकरी मुली व प्रवाशांना उन्हात पहावी लागते बसची वाट

पाटोदा (प्रतिनिधी )पाटोदा शहरातील पारगाव रोडवरील आण्णाभाऊ साठे चौक येथे बसथांब्यावर निवाराशेड नसल्यामुळे शाळकरी मुली, विद्यार्थी, महिला व प्रवाशांना कडक उन्हात उभे राहून बसची वाट पाहावी लागत असल्याचे वास्तव समोर आले आहे. उन्हाळ्याची तीव्रता दिवसेंदिवस वाढत असताना देखील या ठिकाणी प्रवाशांसाठी कोणतीही मूलभूत सुविधा उपलब्ध नसल्यामुळे नागरिकांमध्ये नाराजीचे वातावरण निर्माण झाले आहे.पाटोदा शहरातील पारगाव रोड हा अत्यंत वर्दळीचा मार्ग असून या मार्गावरून दररोज मोठ्या प्रमाणावर नागरिक, शेतकरी, कामगार तसेच शाळा व महाविद्यालयात जाणारे विद्यार्थी प्रवास करतात. विशेषतः सकाळी व दुपारच्या वेळेस आण्णाभाऊ साठे चौक येथे बसची वाट पाहण्यासाठी विद्यार्थ्यांची मोठी गर्दी होत असते. मात्र या ठिकाणी बसण्यासाठी बाके, सावलीसाठी निवाराशेड किंवा पिण्याच्या पाण्याची कोणतीही व्यवस्था नसल्यामुळे शाळकरी मुली व इतर प्रवाशांना कडक उन्हात उभे राहून बसची प्रतीक्षा करावी लागत आहे.उन्हाळ्याच्या दिवसांमध्ये तापमान मोठ्या प्रमाणावर वाढत असल्याने शाळकरी मुली, लहान मुले तसेच ज्येष्ठ नागरिकांना याचा विशेष त्रास सहन करावा लागत आहे. काही वेळा बस उशिरा आल्यास प्रवाशांना २० ते ३० मिनिटे उन्हातच उभे राहावे लागते. त्यामुळे अनेक वेळा विद्यार्थ्यांना अस्वस्थता जाणवते, अशी माहिती स्थानिक नागरिकांनी दिली आहे.याचप्रमाणे पावसाळ्याच्या दिवसांमध्ये देखील परिस्थिती अधिक बिकट होते. बसची प्रतीक्षा करताना प्रवाशांना पावसात भिजत उभे राहावे लागते. त्यामुळे महिला व विद्यार्थिनींना मोठ्या गैरसोयीचा सामना करावा लागतो. शहरातील प्रमुख चौक असलेल्या या ठिकाणी प्रवाशांसाठी साधे निवाराशेडही उपलब्ध नसणे ही अत्यंत खेदजनक बाब असल्याची प्रतिक्रिया नागरिक व्यक्त करत आहेत.स्थानिक नागरिक व प्रवाशांनी अनेक वेळा संबंधित प्रशासनाचे लक्ष या समस्येकडे वेधले असल्याचे सांगितले जाते. मात्र अद्याप या ठिकाणी कोणतीही ठोस उपाययोजना करण्यात आलेली नाही. त्यामुळे संबंधित विभागाने पारगाव रोडवरील आण्णाभाऊ साठे चौक येथे तातडीने निवाराशेड उभारून बसथांब्याची व्यवस्था करावी,अशी मागणी नागरिक, विद्यार्थी व प्रवाशांकडून जोर धरू लागली आहे.