श्री. रामचंद्र पाटील यांना मराठा सेवा संघाकडून “सर्वोत्कृष्ट राज्य प्रदेशाध्यक्ष – २०२६” पुरस्काराने गौरव

सिंदखेडराजा, महाराष्ट्र येथे दिनांक १२ जानेवारी २०२६ रोजी राजमाता जिजाऊ माँसाहेब जयंतीनिमित्त मराठा सेवा संघ राष्ट्रीय कार्यकारिणीच्या वतीने राष्ट्रीय पुरस्कार वितरण सोहळ्याचे भव्य व दिमाखदार आयोजन करण्यात आले होते.

या कार्यक्रमास देशातील सर्व राज्यांचे प्रदेशाध्यक्ष, केंद्रीय व राज्य कार्यकारिणीचे पदाधिकारी, विविध जिल्ह्यांचे जिल्हाध्यक्ष तसेच देशभरातून आलेले पदाधिकारी, कार्यकर्ते व समाजबांधव मोठ्या संख्येने उपस्थित होते.

मराठा सेवा संघाच्या संघटनात्मक विस्तारासाठी, सामाजिक कार्यासाठी तसेच नेतृत्वपूर्ण योगदानासाठी मराठा सेवा संघ गोवा राज्याचे प्रदेशाध्यक्ष श्री. रामचंद्र पाटील यांना “सर्वोत्कृष्ट राज्य प्रदेशाध्यक्ष – २०२६” या मानाच्या राष्ट्रीय पुरस्काराने गौरविण्यात आले. हा पुरस्कार मराठा सेवा संघाचे राष्ट्रीय अध्यक्ष आदरणीय श्री. कामाजी पवार साहेब यांच्या शुभहस्ते प्रदान करण्यात आला.

पुरस्कारप्रसंगी श्री. रामचंद्र पाटील यांना स्मृतिचिन्ह तसेच मराठा सेवा संघाचे कॅलेंडर देऊन सन्मानित करण्यात आले. गोवा राज्यात मराठा सेवा संघाची प्रभावी संघटनात्मक बांधणी, सामाजिक-शैक्षणिक उपक्रम, समाजप्रबोधनाचे कार्य तसेच सातत्यपूर्ण संघटनात्मक वाढ या उल्लेखनीय कार्याची दखल घेऊन त्यांना हा पुरस्कार प्रदान करण्यात आला.

श्री. रामचंद्र पाटील यांच्या नेतृत्वाखाली संघटनेचे कार्य अधिक गतिमान, शिस्तबद्ध व प्रभावी झाल्याचे गौरवोद्गार यावेळी मान्यवरांनी काढले.

या राष्ट्रीय पुरस्कार वितरण सोहळ्याच्या अध्यक्षस्थानी मराठा सेवा संघाचे प्रदेश कार्याध्यक्ष शिवश्री नवनाथ घाडगे होते. तसेच डॉ. निर्मला पाटील (राष्ट्रीय अध्यक्ष – जिजाऊ ब्रिगेड), सुनील महाजन (मध्य भारत), डॉ. सोपान क्षीरसागर (दक्षिण भारत), डॉ. संजय पाटील (उत्तर भारत), इंजि. शिवाजीराजे पाटील (प्रबोधन कक्ष), प्रा. कपिल पिचेराव (कार्यालयीन सचिव), विलास पाटील (तानुबाई बिरजे पत्रकार परिषद), आर. एस. पाटील, सुनील महाजन व गणेश पाटील यांच्यासह अनेक मान्यवर उपस्थित होते.

आपल्या भावना व्यक्त करताना सत्कारमूर्ती श्री. रामचंद्र पाटील म्हणाले,

“हा सन्मान माझा नसून गोवा राज्यातील मराठा सेवा संघाच्या सर्व पदाधिकारी, सहकारी व कार्यकर्त्यांचा आहे. त्यांच्या सातत्यपूर्ण सहकार्यामुळेच हे कार्य शक्य झाले.”

राजमाता जिजाऊ माँसाहेबांच्या विचारांना अभिवादन करत हा राष्ट्रीय पुरस्कार वितरण सोहळा अत्यंत उत्साहपूर्ण, प्रेरणादायी व ऐतिहासिक वातावरणात संपन्न झाला.